Në Lombardi, rajonin më të prekur të Italisë nga koronavirusi, rastet pozitive të të prekurve me koronavirus shkojnë në 60314, me një shtim prej 1262 në orët e fundit.
Një ditë më parë kishte një shtim prej 1460 të rasteve, mirëpo në orët e fundit janë bërë 4000 tamponë më pak.
Ndërkohë numri i të vdekurve është shtuar me 280 në orët e fundit, duke e çuar shifrën totale ne 10.901, teksa një ditë më parë u shënuan 110 raste të reja.
Personat e shtruar në spital kanë shkuar në 12028, me një shtim prej 58 pacientësh, ndërsa aktualisht në terapi intensive ndodhen 1143, me një rënie prej 33 personash.
I ngarkuari për shëndetësinë në rajonin e Lombardisë, Giulio Gallera deklaroi se kjo është një linjë e qëndrueshme, por që nuk po zbret nëpër qytete, sidomos në Milano.
“Me shifrat e fundit shpresojmë që të jetë mbyllur trendi i rritjes”, deklaroi ai.
Ndërkohë në Itali, numri i viktimave në 24 orët e fundit u shtua me 566 të vdekur.
