Lëvizja Socialiste për Integrim ka reaguar ditën e sotme në lidhje me lajmin e publikuar në media se rreth 600 persona janë shtuar në listat e zgjedhësve në bashkinë Vorë, por që nuk kanë lidhje me këtë bashki.
Në një dalje për mediat, Sekretari i Përgjithshëm i LSI Luan Rama tha se këto janë fakte skandaloze të tentativës për manipulim të zgjedhjeve nga ana e kreut aktual të bashkisë së Vorës dhe njëherësh edhe kandidati i PD në këtë bashki Fiqiri Ismaili.
Rama lexoi fakte të shtimit të personave që jetojnë jashtë Vorës, por që janë marrë nën administrim nga punonjës të bashkisë së Vorës. Sipas Ramës kjo është një veprimtari kriminale.
“Lavdie keci figuron në Vorë edhe pse është banuese në Kavajë. Ka votues që nuk kanë lidhje me Vorën që janë marrë në kujdestari nga punonjës të bashkisë ose të afërm të tyre. kjo do të thotë se punonjës të bashkisë kanë strehuar në shtëpinë e tyre votues që nuk banojnë në Vorë. Janë një mori të punonjësve të bashkisë së Vorës, të afërm të tyre që janë bërë pjesë e kësaj loje për të manipuluar zgjedhjet. Një punonjës i policisë së burgjeve, veç anëtarëve të familjes së tij pranon se ka edhe 9 banorë që jetojnë në shtëpinë e tij. Vetë noteri Shaban Gjoka ka regjistruar këta persona.” u shpreh Luan Rama
