Një shqiptar është arrestuar gjatë së dielës nga policia italiane, teksa do të nisej drejt Londrës, Angli, me fluturimin FR983 të orës 12.00.
Gjatë kontrollit të dokumenteve të pasagjerëve që do të niseshin nga aeroporti i Pescara, në kartën me identitet italian të të riut të lindur në vitin 1985 në Foggia, rezultoi diçka e dyshimtë.
Kontrollorët nisën që ta pyesin të riun lidhur me arsyen e udhëtimit, ku në këtë moment shqiptari u shfaq nervoz dhe me theks të huaj.
Duke pasur dyshime, karta e identitetit e shqiptarit iu nënshtrua verifikimeve me paisjet e pranishme në aeroport, ku u zbulua se ishte dokument fals.
Nga kontrolli në bagazhet e tij u gjet edhe pasaporta e tij shqitare me identitetin e vërtetë.
Kështu u zbulua se shqiptari, kishte lindur në vitin 1992 në Tiranë dhe kjo bëri që të arrestohet, nën akuzën e falsifikimit të dokumentave.
Nga verifikimet e kryera, rezultoi se shqiptari kishte hyrë në Itali me pasaportën e tij shqiptare dhe më tej kishte siguruar dokumentin italian të falsifikuar.
g.kosovari
