Deputeti i zgjedhur i Partisë Demokratike në qarkun e Lezhës, në zgjedhjet e 11 majit Gjin Gjoni, paralajmëroi se për PD-në dhe opozitën, shtatori do jetë një muaj sulmi.
Më tej ai thekson se strategjia e opozitës në parlamentin e ri, duhet të jetë komplet tjetër nga më parë.
Sakaq, vlerësoi grupin e ri parlamentar ku bën pjesë, teksa shtoi se ai do jetë refraktar.
“Jam në takime në zona të caktuara. Në takime me shumë emigrantë që kanë ardhur. Interesi i tyre është shumë i madh. Vazhdoj marr shqetësimet e qytetarëve të zonës. Kam qenë shumë aktiv dhe në rrjetet sociale. Shtatori do jetë një muaj sulmi.
E gjithë mënyra si duhet ndërtuar strategjia e PD duhet të jetë në dimension komplet tjetër. Deri tani jemi marrë me evidentimin e farsës elektorale. Presim raportin përfundimtar të OSBE/ODIHR. Paralelisht duhet të fillojë dhe analiza e PD, duke ecur me pjesën parlamentare dhe me protestat.
Elementët që janë grupi parlamentar sot, janë me eksperiencë politike. Disa kanë më shumë se 5 6 mandate. Niveli intelektual i grupit parlamentar, është nivel shumë më të lartë. Jeta parlamentare do i ketë vështirësitë e veta për shkak të numrave.
Pjesa kryesore do jetë përgatitja e legjislacionit të ri. Do jemi refraktar. Do jemi bashkëpunues për hyrjen në BE. Gjithmonë në përputhje me standardet demokratike”, tha ai për News 24.
