Një shqiptar, emigrant ilegal në Britaninë e Madhe kishte hyrë në një banesë për të vjedhur. Por, ai është zbuluar nga pronari i saj, i cili e ka parë nëpërmjet një uebkamere, ndërsa ishte me pushime në Francë. Sipas “Daily Mail”, ngjarja ka ndodhur më 17 gusht të 2015-s, ku 21-vjeçari ishte përgatitur që të vidhte një banesë në jugperëndim të Londrës.
Pronari i saj, David Pearce, i cili e pa të gjithë skenën me anë të WiFi në kamerën e instaluar në celularin e tij, lajmëroi fqinjët të cilët shkuan në shtëpinë e tij dhe frikësuan shqiptarin së bashku me një tjetër bashkëpunëtor. “Daily Mail” shkruan se Puka u kap teksa ishte duke u fshehur në një shkurre. Thuhet se ai është autor i një tjetër grabitjeje muaj më parë. 21-vjeçari, u dënuar me nëntë muaj burgim për dy rastet e vjedhjes në Gjykatën Isleworth Crown, dhe ai do të deportohet në Shqipëri pas dy muajsh.
