Tashmë që rezultatet po shkojnë drejt certifikimit, emocionet e numërimit të votave ditët e para po ia lënë vendin ftohtësisë së shifrave dhe rezultateve që solli 11 Maji.
Shqiptarët votuan dhe vendosën që në Parlamentin e ri të kenë një shumicë të cilësuar deputetësh që do t’i përkasin vetëm një partie politike, dhe ajo është Partia Socialiste.
Po të shohësh tabelat e rezultateve të prodhuara nga Komisioni Qendror i Zgjedhjeve kupton në një vështrim të përgjithshëm se dy partitë që pësuan rritje në nivel kombëtar, krahasuar me katër vjet më parë, janë PS-ja dhe Partia Socialdemokrate.
Socialistët siguruan 88.184 vota më shumë se në vitin 2021, ndërsa partia e Tom Doshit fitoi 14.415 vota më shumë. Formula e llogaritjes së mandateve, megjithatë, nuk e favorizoi PSD-në, që nga 3 mandate të merrte më shumë, duke qëndruar në të njëjtat kuota si në vitin 2021. Ndërsa gati 90 mijë votat plus të socialistëve u përkthyen në 9 deputetë më shumë krahasuar me katër vjet më parë.
Nga qarku në qark, shifrat kanë lëvizur në mënyra të ndryshme. Në Shkodrën e vitit 2025, PD-ja humbi 4.180 vota, por arriti të ruante 5 mandate deputetësh. PS-ja fitoi në Shkodër 10.125 vota më shumë, duke siguruar edhe një deputet më shumë; nga 3 u bë me 4 në Shkodër, çka do të thotë se të majtët i kanë rrëmbyer elektoratit të opozitës mandatin që mbante LSI-ja katër vjet më parë. PSD-ja me 16.806 vota ruajti në Shkodër 2 mandate.
Në rastin e opozitës, situata vlerësohet në dy mënyra, sepse në vitin 2021, LSI-ja dhe PD-ja garuan veç e veç dhe së bashku morën 729.725 vota, duke u ndarë nga të majtët e Edi Ramës asokohe vetëm për 38.409 vota.
Në këto zgjedhje, partia e z. Ilir Meta ishte pjesë e koalicionit të demokratëve dhe morën së bashku me të gjitha partitë e tjera të vogla 529.435 vota, duke humbur në total 200.290 vota në krahasim me 4 vjet më parë.
Në këtë llogari nuk hyn partia e Lulzim Bashës, Koalicioni Euroatlantik, e cila mori në këto zgjedhje 20.864 vota.
Partitë e reja janë rishtare në këto llogari dhe ende nuk është e qartë se nga cilat shtresa e tërhoqën votën, nga partitë tradicionale apo nga elektorati gri.
Në Durrës, rezultati për numër mandatesh nuk ndryshoi, pavarësisht se PD-ja humbi më shumë se 4 mijë vota dhe PS-ja u rrit me më shumë se 7 mijë vota. Elbasani vulosi për PS-në atë që nuk arriti Durrësi në llogaritë e socialistëve.
Gazetare: Sonila Agostini
