Çdo vit mbi 8200 qytetarë aplikojnë për targa të veçanta për automjetet e tyre. Targa jashtë serie apo me përzgjedhje, duke kombinuar numra dhe shkronja.
“Unë si numër e kam shumë qejf njëshin edhe ngaqë kam edhe mjete të tjera dhe dua t’i kem të gjitha të së njëjtës numër vendosa që edhe këtë herë të merrja 001 për automjetin e ri që kam në emrin tim” – thotë një qytetar.
Sipas të dhënave nga Drejtoria e Përgjithshme e Transportit Rrugor, nga viti në vit shqiptarët po fiksohen gjithnjë e më shumë pas targave të veçanta.
“Ky është një shërbim që ka një kërkesë në rritje çdo ditë e më shumë. Në vitin 2021 kemi patur rreth 8212 kërkesa për aplikim për targa me përzgjedhje. Në DPSHTRR aktualisht kemi dy kategori targash me përzgjedhje, kemi targat e veçanta dhe targat jashtë serie. Targat e veçanta janë ato kategori që kanë një specifikë numërore dhe shkronjore gërmash, por me një gamë më të ulët të shkronjave” – deklaron Brikena Dashi, juriste e DPSHTRR.
Pas kontrollit teknik, dhe shërbimi për errësimin e xhamave të ardhurat nga targat në Drejtorinë e Shërbimit të Transportit Rrugor zënë vendin e tretë. Këto dy modele janë jashtë serie të përzgjedhur nga qytetarët. Vlera e targave jashtë serie varion nga 10 mijë deri në 40 mijë Lekë.
“Vetëm në 2021 kemi 103 milionë Lekë të ardhura, ndërsa për tremujorin e 2022 kemi rreth 1884 kërkesa për targa me përzgjedhje” – vijon Dashi.
Por çfarë përzgjedhin më shumë shqiptarët?
“Në përgjithësi personalizojnë shkronjën e parë të emrit dhe shkronjën e parë të mbiemrit”.
Në Shqipëri janë aktualisht 740 mijë automjete të regjistruara për qarkullim. Ata që janë të fiksuar pas emrit të tyre, shumë shpejt mund ta përdorin edhe si targë automjeti.
/a.r
