134 minuta në celular
Gjatë këtij viti shqiptarët kanë kryer mesatarisht 134 minuta thirrje dalëse në muaj nga celulari i tyre. Sipas të dhënave nga Autoriteti i Komunikimeve Elektronike dhe Postare, për gjashtë muajt e parë të këtij viti trafiku mesatar i thirrjeve dalëse është rritur me 13% kundrejt të njëjtës periudhë të një viti më parë.
Ulja drastike e tarifave, kryesisht përmes paketave ofertë po sjell rritje të vazhdueshme të komunikimit përmes telefonit celular. Konkurrenca e ashpër mes operatorëve dhe ulja e përshkallëzuar e tarifave të interkoneksionit po shkon në favor të përdoruesve dhe përdorimit më të gjerë të shërbimeve të lëvizshme. Komunikimi i lirë zanor përmes celularit po ndihet edhe në shërbimet alternative, duke filluar madje që nga mesazhet e shkruara përmes celularëve.
Sipas AKEP, në gjysmën e parë të këtij viti çdo përdorues, i kuptuar si numër celular aktiv, dërgoi mesaatrisht 27 mesazhe të shkruara në muaj, nga 39 që ishte përdorimi mesatar në të njëjtën periudhë të një viti më parë.
Mesazhet po përdoren më pak sepse telefonatat janë më të lira, por ndoshta edhe nga rritja e përdorimit të aplikacioneve për mesazhe të mbështetura në internet, si whatsapp apo viber, sidomos mes të rinjve. Komunikimi me celular ka tkurrur akoma më shumë përdorimin e telefonisë fikse.
Sipas AKEP, i thithë trafiku nga rrjette fikse vitin e kaluar përbënte vetëm 3% të totalit, ndërsa trafiku në rrjetet celulare mbizotëronte me 97%.
Redaksia Java News/ f.g
