Unioni i Gazetarëve Shqiptarë (UGSH) ka reaguar me shqetësim ndaj mosrespektimit të ligjit për përdorimin e gjuhës shqipe në Maqedoninë e Veriut. Reagimi vjen pas një sërë denoncimesh publike dhe mediash, si dhe thirrjeve nga organizata dhe personalitete të shoqërisë civile multietnike të vendit fqinj.
Përmes një postimi në rrjetet sociale, UGSH e konsideron këtë praktikë si një akt goditës ndaj të drejtave themelore dhe parimeve të shtetit të së drejtës.
“Si vend kandidat për anëtarësim në BE, Maqedonia e Veriut duhet të respektojë të drejtën për përdorimin e gjuhës shqipe, e cila është e garantuar nga Kushtetuta dhe thelbësore për bashkëjetesën dhe stabilitetin e vendit”, theksohet në reagim.
Union i Gazetarëve Shqiptarë u bën thirrje mediave dhe kolegëve maqedonas të jenë solidarë dhe të raportojnë me objektivitet çdo rast të shkeljes së këtij ligji, duke përfshirë edhe veprimet e përfaqësuesve të lartë institucionalë.
UGSH mbështet gjithashtu apelin dhe thirrjet për reagime publike nga qytetarët shqiptarë dhe maqedonas dhe i bën thirrje anëtarëve të tij të jenë pjesë e protestës së paralajmëruar të studentëve, duke e pasqyruar atë në mediat kombëtare dhe ndërkombëtare.
Për më tepër, UGSH kërkon nga institucionet e Shqipërisë dhe përfaqësuesit në organizmat ndërkombëtarë që të ngrenë zërin dhe të kërkojnë hetime për garantimin dhe zbatimin e të drejtës themelore për gjuhën amtare të shqiptarëve në Maqedoninë e Veriut.
Çfarë ka ndodhur?
Ligji në Maqedoninë e Veriut e garanton përdorimin e gjuhës shqipe për shqiptarët që jetojnë atje. Sipas UGSH-së dhe denoncimeve të ndryshme, ky ligj nuk po respektohet nga disa autoritete, institucione dhe politikanë. Për shembull, gjuhës shqipe mund t’i mohohet përdorimi në dokumente, shërbime publike ose në komunikim zyrtar.
Maqedonia e Veriut ka rreth 2 milionë banorë, ku 54% janë maqedonas, 29% shqiptarë dhe pjesa tjetër i përkasin komuniteteve më të vogla. Përdorimi i gjuhës shqipe është rregulluar më parë edhe me ligje të tjera, përfshirë një të vitit 2008, i cili, sipas ekspertëve të drejtësisë, kishte një interpretim të kufizuar të përdorimit të saj.
Studentët shqiptarë kanë paralajmëruar protestë më 6 prill në Shkup, duke shprehur pakënaqësinë ndaj mosofrimit të provimit të Jurisprudencës edhe në gjuhën shqipe krahas asaj maqedonase. Ata kërkojnë barazi dhe zbatim të Ligjit të Gjuhëve, kërkesë të cilën Ministria e Drejtësisë e ka refuzuar.
Protesta do të mbahet të hënën (6 prill) në ora 12:30 para Urës së Gurit në Shkup dhe do të vazhdojë deri te Ministria e Drejtësisë.
