I shoqëruar nga ministri i Mjedisit dhe Turizmit, kryeministri Rama ka vijuar inspektimet pasditen e së dielës në qarkun e Beratit.
Zyrtarë lokalë dhe banorë të Kutalisë kanë raportuar problemet e shkaktuara nga reshjet, ndërsa i kanë kërkuar Ramës edhe ndërtimin e rrugëve të reja.
“Këtu në këtë bashki janë pastruar rreth 80% e kanaleve që kishin 20 e ca vjet të bllokuara. Po bëjmë një program të ri financimi të emergjencës dhe do shkojmë në të gjitha ato pikat e dobëta, pasi kemi zgjidhur një pjesë të pikave të nxehta të 2015 e jam i bindur që do kemi një aftësi mbrojtëse shumë më të madhe” – tha Rama.
Por këtë të diel, kreu i ekzekutivit nuk ka shmangur edhe batutat me banorët. Teksa i kanë kërkuar ndërtimin e rrugëve rurale, Rama ka replikuar me ironi me banorët.
“Ti me siguri nuk je i martuar?” – iu drejtua kryeministri një banori.
Por përgjigja ishte se jo vetëm që ishte i martuar, por kishte edhe dy fëmijë.
“Epo nuk i ke bërë të dy përnjëherë… Se nuk e kemi Ferrari Shqipërinë, e kemi Fiat Punto…” – tha Rama duke ilustruar se rrugët nuk mund të bëhen të gjitha njëherësh.
I pyetur me shaka për “punën e gishtit me Bashën”, Rama tha: Lëreni Lulin se e kemi shok të mirë. Do rritet avash avash…
Për më tepër ndiqni videon e mëposhtme:
/JAVANEWS/
