Krimi shqiptar jashtë territorit të vendit dhe sjellja e parasë së krimit për t’u investuar këtu, apo qoftë edhe mbledhja e provave të tjera për vepra të ndryshme penale, ka detyruar shumë shtete t’i drejtohen vendit tonë për ndihmë juridike. Autoritetet e huaja, gjatë vitit 2024 i përcollën Shqipërisë 659 letërporosi, të cilat përfshijnë Prokurorinë e Posaçme dhe ato të juridiksionit të përgjithshëm. Në mesin e tyre, 70 i erdhën SPAK-ut, për të cilat është kryer hetim dhe kthim-përgjigje për 56 prej tyre, por vijon procesi për përmbylljen e plotë të 14 të mbeturave. Nga ana tjetër, prokuroritë e juridiksionit të përgjithshëm morën 599 letërporosi dhe për vetëm 219 prej tyre ka pasur kthim-përgjigje, duke lënë pjesën më të madhe të tyre në proces, 380.
Për të dytin vit radhazi, Belgjika kryeson me numrin më të lartë të kërkesave drejtuar SPAK, 13 të tilla, ndjekur nga Gjermania, Franca, Holanda, Kosova, e deri tek Ekuadori. Nga ana tjetër, te prokuroritë e zakonshme kryeson Gjermania, me 112 letërporosi, ndjekur nga Kosova me 106.
Por, Shqipëria nga ana e saj ka pasur më shumë nevojë nga autoritetet e huaja për ndihmë juridike. Në total, gjatë vitit që lamë pas u nisën 702 letërporosi, përkatësisht 163 nga SPAK dhe 539 nga prokuroritë e zakonshme. Për SPAK kryeson Franca, me 40 të tilla, por me vetëm 8 kthim-përgjigje. Lista vijon me shtete evropiane, e deri te SHBA, Brazili, Ekuadori e Republika Domenikane. Sa i takon prokurorive të rretheve, Tirana ka nisur pjesën më të madhe te tyre, 151, për të vijuar më Durrësin dhe Shkodrën.
Vendet e huaja kërkojnë informacione nga Shqipëria, sidomos nga SPAK, kryesisht për vepra penale të trafikut të drogës, pastrimit të parave apo mashtrimit kompjuterik, ndërsa vendi ynë, përveç tyre, kërkon të di edhe për vepra të korrupsionit, nga shpërdorimi i detyrës, deri te korrupsioni pasiv i funksionarëve të lartë, çka do të thotë se një pjesë e tyre, aktivitetin e korrupsionit e kanë shtrirë edhe jashtë./ shqiptarja
