Shqipëria më në fund ka treguar dhëmbët karshi Maqedonisë për të drejtën e saj dhe kjo ka sjellë tërheqjen e shtetit maqedonas. Pas bllokimit të produkteve bujqësore shqiptare, ministri i ekonomisë, Arben Ahmetaj, ka biseduar me homologun tij maqedonas, duke i kërkuar sqarime për bllokimin e perimeve, por njëherazi edhe duke i dhënë një ultimtum për zgjidhje të problemit deri sot. Në të kundërt, Shqipëria do t’u mbyllë dyert të gjitha produkteve maqedonase.
Duket se ka pasur efekt të menjëhershëm, pasi ish-Republika Jugosllave ka hequr embargon.
I pyetur për bisedën nga ATSH, Ahmetaj tha “hshtë e dyta herë që unë komunikoj zyrtarisht me palën maqedonase. Edhe para një muaji diskutuam kur produktet bujqësore u bllokuan në doganën maqedonase për shkak të një rregulloreje, e cila keqpërdoret shpeshherë ndaj produkteve bujqësore shqiptare dhe krijon humbje për fermerët apo për kompanitë që organizojnë eksportin, në rastin konkret të domates. Rregullorja në fjalë e Maqedonisë ka një afat kohor deri në 5 ditë për t’u kthyer përgjigje analizave që, siç e theksova, shpesh herë edhe keqpërdoret nga institucionet dhe unë kam kërkuar nga ministri i Ekonomisë së Maqedonisë dhe nga ministri i Financave që situata do të duhet të zgjidhet menjëherë brenda ditës së martë. Nëse jo, ne, brenda të gjithë të drejtave që na jep edhe marrëveshja e tregtisë së lirë CEFTA me të gjithë vendet e Ballkanit Perëndimor, kemi të drejtë të ndërmarrin akte reciprociteti ndaj eksporteve maqedonase, importit të tyre në Republikën e Shqipërisë dhe kuptohet që në këtë aspekt jemi në të drejtën tonë legjitime për ta kthyer aktin një akt reciprociteti. Sigurisht që nuk është zgjidhja më e mirë”.
Ministri Ahmetaj shtoi se çështja nuk do të mbarojë me kaq:
“Të enjten do të zhvillohet ne Moldavi mbledhja e Nënkomitetit të CEFTA-s ku kjo do të jetë çështja kryesore që do të ngrejë Shqipëria”, konfirmoi Ahmetaj.
