Disa kompani që ishin kontraktuar nga ish-shoqëria CEZ Albania, për mbledhjen e borxhit në vitin 2012, kanë paditur në Arbitrazhin Ndërkombëtar shtetin shqiptar, ku kërkojnë 170 milionë euro.
Burime nga Avokatura e Shtetit thanë për Shqip se kompanitë në fjalë kanë punuar në periudhën korrik-dhjetor 2012 dhe kanë përfituar miliona euro.
Më pas, atyre u është prishur kontrata, disa muaj pasi ERE i hoqi licencën shoqërisë CEZ dhe duke emëruar një administrator. Mësohet se shoqëritë kishin lidhur marrëveshje për mbledhjen e borxhit, ku çdo firmë merrte 50 për qind të parave që mblidheshin nga abonentët.
Në fakt, në atë kohë, këto firma u akuzuan se nuk realizuan asnjë pikë të kontratës me CEZ, madje kishte dyshime se kontratat në fjalë janë lidhur fiktivisht, me qëllimin e vetëm për të zhvatur kompaninë.
Burime nga Avokatura e Shtetit pohojnë se mes shoqërive që kërkon nga Arbitrazhi Ndërkombëtar është edhe ajo e shtetasit Kastriot Ismailaj, ndaj të cilit prokuroria ka filluar disa hetime për mashtrim, pikërisht me kontratat që ka lidhur me CEZ-in, dhe që ka përfituar rreth 6 milionë euro pa kryer asnjë punë.
