Shqipëria po kërkon një model të ri ekonomik. Së paku në tre dekadat e fundit ekonomia ka ecur në të njëjtat shina, duke kopjuar veten ndërsa politikat e ndërmarra kanë tentuar kryesisht përfitime afatshkurtra. Por sot vendi ka nevojë për hapa konkretë drejt modelimit të ekonomisë që ndërton bazën e duhur për brezat e ardhshëm.
“Aktualisht, po bashkëpunojmë për krijimin e një infrastrukture të fortë dhe të dobishme për modelimin ekonomik për të mbështetur vendimmarrjen e Bankës së Shqipërisë në lidhje me ndryshimet klimatike, si dhe ndikimin e tyre në stabilitetin financiar”, tha Gent Sejko, guvernatori i Bankës së Shqipërisë.
Në dekadën e katërt të tranzicionit, vendi po rezulton i paaftë për të përmirësuar e aq më pak për të ndryshuar veten, ndaj në ndihmë do të vijë Zvicra përmes kërkimeve ekonomike.
“Kërkimi është thelbësor për të përmirësuar efektivitetin e Bankave Qendrore. Ai mundëson një kuadër të ri për të vendosur normat e duhura bazë të interesit dhe për të menaxhuar krizat. Gjithashtu ofron evidencat e duhura për të vlerësuar zhvillimet”, u shpreh Ruth Huber Ambasadore e Zvicrës, Shqipëri.
Nga tryeza e 18-të Kërkimeve Ekonomike për Evropën Juglindore, guvernatori Gent Sejko nxori në pah gjithë zhvillimet që cenojnë stabilitetin ekonomik të vendit.
“Më duhet të nënvizoj që ekonomia shqiptare ka pësuar ndryshime të rëndësishme strukturore, që lidhen me rritjen e shpejtë të turizmit dhe ndërtimit; ndryshime demografike të lidhura me plakjen e popullsisë, migrimin e saj, si dhe procesin e integrimit në BE. Ekonomia e Shqipërisë është përballur me luhatje të konsiderueshme të çmimeve për shkak të fenomeneve natyrore, goditjeve ekonomike dhe zhvillimeve gjeopolitike”, tha Sejko.
Zvicra vlerëson se Shqipëria duhet të zhvillojë një ekonomi që prodhon pasuri dhe mirëqenie për të gjithë, lehtëson pabarazinë, promovon konkurrencën dhe punon në një mjedis të shëndetshëm biznesi. Po që kjo të arrihet, politikat qeveritare dhe biznesi duhet ta vlerësojnë edhe më shumë individin, si kapitalin më të çmuar në një shoqëri. (
