Në një intervistë për rrjetin televiziv ballkanik Insider, raportuesi për vendin tonë në Parlamentin Europian, Andreas Schider, vlerëson vullnetin politik të Shqipërisë për reformat e integrimit.
“Shqipëria ka një plan ambicioz jo vetëm për hapjen e grupkapitujve, por edhe për mbylljen e tyre deri në vitin 2027. Duhet të them se procesi i hapjes së kapitujve është i rëndësishëm, por pmbyllja e tyre është akoma më e rëndësishme. Zbatimi i reformave është edhe më i vështirë, por shqiptarët janë shumë të përkushtuar politikisht për të ecur më shpejt përpar”, tha Andreas Shcider, reporter për Shqipërinë në PE.
Schider i referohet reformës në drejtësi.
“Në Shqipëri kanë bërë një reformë jashtëzakonisht të vështirë, por tashmë kanë një sistem gjyqësor modern. Ata kanë ngritur SPAK-un që po heton njerëz nga të gjitha partitë politike, ata janë hetuar, madje disa kanë përfunduar në burg”, tha Andreas Shcider, reporter për Shqipërinë në PE.
Schider thekson se situata ekonomike në rajon është e ngjashme por dallimi qëndron tek qeverisja dhe vullneti politik për reforma.
“Të gjithë në rajon, serb, malazez, shqiptarë, maqedonas, duan të punojnë shumë, të gjithë duan t’i dërgojnë fëmijët e tyre në shkolla të mira. Aty ka njerëz të guximshëm por dallimi mes këtyre shteteve është tek vullneti politik për reforma në qeverisje”, tha Andreas Shcider, reporter për Shqipërinë në PE.
