Kryeministri i Shqipërisë, Edi Rama, ndodhet në Tokio të Japonisë, ku është pritur në një ceremoni zyrtare nga kryeministrja japoneze Sanae Takaichi. Gjatë ceremonisë së pritjes dhe deklaratave për shtyp, dy liderët vlerësuan marrëdhëniet mes dy vendeve dhe theksuan forcimin e bashkëpunimit politik e ekonomik.
Kryeministrja japoneze Sanae Takaichi u shpreh e lumtur për takimin e parë me kreun e qeverisë shqiptare, duke e cilësuar Shqipërinë një partnere të rëndësishme për Japoninë.
Takaichi vlerësoi gjithashtu rolin e Shqipërisë në ruajtjen e stabilitetit në Ballkanin Perëndimor dhe falënderoi qeverinë shqiptare për mbështetjen ndaj vizionit për një Indo-Paqësor të lirë dhe të hapur.
Kryeministrja e Japonisë SanaeTakaichi:E mirëpres me zemër vizitën e Kryeministrit Rama, sot. Jam shumë e lumtur që kam mundësinë t’ju takoj për herë të parë.
Shqipëria është partnere e rëndësishme, me të cilën ndajmë vlera dhe parime të përbashkëta. Ne jemi të kënaqur që negociatat e anëtarësimit të Shqipërisë në Bashkimin Europian po përparojnë në mënyrë të qëndrueshme.
Japonia, në kuadër të Nismës së Bashkëpunimit me Ballkanin Perëndimor, të propozuar nga ish-Kryeministri do të vijojë të mbështesë fuqimisht anëtarësimin e Shqipërisë në BE.
I shpreh respekt Shqipërisë për kontributin aktiv që jep në stabilitetin rajonal në Ballkanin Perëndimor, një rajon me histori komplekse.
Gjithashtu, ju falënderoj nga zemra për mbështetjen e Shqipërisë ndaj vizionit për një Indo-Paqësor të lirë dhe të hapur.Këtë muaj, në përvjetorin e dhjetë të shpalljes së këtij vizioni, ne prezantuam vizionin e përditësuar për një Indo-Paqësor të lirë dhe të hapur. Ky vizion zhvillon më tej qasjen e mëparshme, duke vendosur autonominë dhe qëndrueshmërinë si dy elemente thelbësore, me synimin që i gjithë rajoni të bëhet së bashku më i fortë dhe më i begatë.
Në një kohë kur siguria e Europës, Atlantikut dhe Indo-Paqësorit po bëhet gjithnjë e më e ndërlidhur, dëshirojmë ta thellojmë edhe më tej bashkëpunimin me Shqipërinë.
