Ndërsa shumë destinacione turistike tradicionale po përballen me turizmin masiv, një numër në rritje vizitorësh po kërkojnë vende që janë më të qeta dhe të pacënuara.
Ekspertët e udhëtimeve, sipas një artikulli të botuar në revistën amerikane “World Footprints” kanë rekomanduar 10 destinacione të reja për t’u vizituar gjatë këtij viti, mes të cilave kryeson Shqipëria.
Nga pikat e nxehta në zhvillim deri te thesaret e fshehura, këto destinacione premtojnë aventura unike, shkruan Tonya Fitzpatrick në këtë artikull.
Sipas kësaj reviste që i dedikohet kryesisht udhëtimeve, Shqipëria po bëhet shpejt destinacioni më i kërkuar i Mesdheut.
E njohur për ujërat e saj të kaltra, qytetet e bukura bregdetare si Saranda dhe rrënojat antike si ato të Butrintit, kjo perlë ballkanike ofron një alternativë të re kundrejt destinacioneve të mbipopulluara më vizitorë si Greqia apo Kroacia.
“Shqipëria mbetet ndër vendet turistike për t’u vizituar edhe në 2025. Ajo ofron histori, peizazhe dhe bukuri mesdhetare me një kosto më të përballushme krahasuar me destinacionet më të njohura evropiane”, tha Tom Hall, zëvendëspresidenti i “Lonely Planet”.
Riviera Shqiptare është shtëpia e plazheve të pacenuara dhe ujërave të pastra kristal – ndërsa pikat kryesore në brendësi të vendit të vogël mesdhetar – përfshijnë Bjeshkët e Nemuna, të preferuara nga alpinistët – dhe Gjirokastrën, një qytet i Trashëgimisë Botërore të UNESCO-s – i famshëm për arkitekturën e tij të epokës osmane.
Ndërsa infrastruktura vazhdon të përmirësohet, Shqipëria ka vendosur të lehtësojë aksesin në atraksionet e saj autentike dhe të pazbuluara, thuhet në revistën amerikane.
Në një epokë kur turizmi masiv po riformulon destinacionet e njohura, eksplorimi i vendeve si Shqipëria ofron jo vetëm një përvojë më intime, por edhe mundësinë për të mbështetur praktikat e qëndrueshme.
