Një arushe e murrme që mbahej prej 6 muajsh në kushte të papërshtatshme në një lokal në Gjirin e Lalëzit, me qëllim tërheqjen e vizitorëve, mbërrin në një qendër rehabilitimi në Gjermani.
Ariu i murrmë ka statusin ‘i përkeqësuar deri në rrezik zhdukje’, pjesë e listës së llojeve ndërkombëtarisht të mbrojtura nga Konventa e Bernës.
Aktualisht, Shqipëria është i vetmi vend i rajonit që nuk ka qendra të rehabilitimit për të mbrojtur dhe riaftësuar individë të llojeve të faunës së egër të kapur, të sekuestruar, apo të braktisur.
Për këto arsye, është kërkuar asistenca e stafit të “Bad Füssing”, në Gjermani, për t’i siguruar arushës një vend më të përshtatshëm për të jetuar.
Shoqata ASPBM, në bashkëpunim me organizatën Animal Rescue Albania (ArSA), Ministrinë e Mjedisit, stafin e Kopshtit Zoologjik të Napolit, Qendrën e Rehablitimit të Arinjve në Gjermani (Gnadenhof für Bären, Bad Füssing), realizuan operacionin e transferimit të arushës drejt kësaj qendre.
Ky operacion i jep shpresë dhe rreth 50 arinjve të tjerë që mbahen në kushte robërie në Shqipëri, citohet Koha. (b.an)