Kreu i Komitetit Olimpik Kombëtar Shqiptar, Fidel Ylli ka treguar se sportistët nga Shqipëria rrinë shumë në rrjetet sociale, gjë që mund t’I ketë dëmtuar në paraqitjet në Olimpiadën e Tokios. Në disa disiplina, Shqipëria nuk ia doli të sigurojë një medalje, ndërsa Ylli tregon se në Olimpiadën e Parisit që është pas tre vitesh do ketë ndryshime në staf dhe sportistët kuqezi do bëjnë një stërvitje më të mirë.
“Me garën e Nikol Merizajt mendoj që ekipi ynë shumë modest ka bërë një paraqitje mjaft të mirë. Tani shpresoj që në bashkëpunim edhe më Ministrinë e Sportit dhe Bashkinë e Tiranës, të bëjmë një plan strategjik, pasi Olimpiada është vetëm tri vite larg. Dëshirojmë që ekipi ynë të shkojë në Paris me 2-3 vjet përgatitje dhe do të shikojmë mundësinë edhe për trajnerë të huaj.
Kosova ka një trajner të jashtëzakonshëm si Driton Kuka, i cili nuk i ka lejuar sportistët që të përdorin rrjete sociale, por vetëm të stërviten si një repart ushtarak dhe prandaj arrijnë edhe rezultate kaq të mira. Ndërsa po të shikosh rrjetet sociale të sportistëve tanë, sheh çdo ditë postime pa mbarim”, tha mes të tjerash Fidel Ylli për Top News.
/a.r
