Kombëtarja shqiptare mbylli përgatitjet në Arenën Kombëtare në prag të ndeshjes me Serbinë. Lajmi i mirë për trajnerin Silvinjo është se i ka të gjithë lojtarët në dispozicion.
Në konferencën për shtyp trajneri i kombëtares shqiptare nuk ia mohoi vlerat lojtarëve kundërshtar, por sipas tij, edhe kuqezinjtë janë në të njëjtat nivele.
Nëse kreu i pankinës kuqezi ishte më diplomat në përgjigje, homologu serb i dha një ultimatum të tijve, por duke respektuar edhe mikpritjen shqiptare.
Tensioni në këtë ndeshje futbolli është mëse i pranishëm.
Ndonëse tifozeria serbe është e ndaluar në stadium, një provokim paraprak për kuqezinjtë shkoi nga gazetarët e Beogradit ndaj kapitenit të kombëtares shqiptare Berat Gjimshiti, por nuk morën përgjigjen që ndoshta kishin menduar.
Dueli Shqipëri-Serbi, i vlefshëm për fazën eliminatore për Botërorin 2026, do të luhet këtë të shtunë në orën 20:45 në Arenën Kombëtare.
