Luhet sonte ndeshja Shqipëri-Francë në stadiumoin e ri. Për mbarëvajtjen e takimit, por edhe për t’i paraprirë çdo lloj situate, janë ndërmarrë masa të rrepta sigurie.
Në të gjithë perimetrin e stadiumit janë mobilizuar forca të shumta policie dhe ato speciale. Edhe hyrja e tifozëve në stadium pritet të jetë e monitoruar rreptësisht.
Policia ka marrë masa ndaluese dhe kufizuese mbi qarkullimin e automjeteve në afërsi të stadiumit dhe në akset rrugore:
-Për lëvizjen e automjeteve në zonën në afërsi të stadiumit, do të jenë të lira vetëm akset rrugore “Rruga e Elbasanit” dhe Unaza, në të dy drejtimet e lëvizjes së saj. Në të gjitha rrugët hyrëse në këtë zonë nuk do të lejohet qarkullimi i automjeteve.
-Parkimi dhe qëndrimi i automjeteve në zonën e mësipërme nuk do të lejohet. Të gjitha automjetet që janë të parkuara brenda zonës së mësipërme, nga ora 12:00 e datës 17.11.2019 duhet të largohen.
Automjetet e autorizuara nga Federata Shqiptare e Futbollit duhet të jenë të pajisura me shenjën dalluese në xhamin e përparmë dhe do të hyjnë nëpërmjet bulevardit “Dëshmorët e Kombit”, tek Ura e Lanës, Libri Universitar dhe Presidenca, me drejtim sheshin “Nënë Tereza” – Rektorati i UT. Në këtë pikë kontrolli për të gjitha automjetet do të bëhet kontrolli antieksploziv i tyre.
Takimi i sotëm nuk ka asnjë vlerë për Shqipërinë për sa i përket pikëve, por një rezultat pozitiv do të kënaqte tifozët e shumtë në shkallët e stadiumit.
/a.r
