Kryetari i Partisë Drejtësi, Integrim dhe Unitet, Shpëtim Idrizi, i ftuar në studion e Rezear Xhaxhiut, nuk i ka kursyer akuzat ndaj kryeministrit Edi Rama, me të cilin ishte në qeveri.
Ai u shpreh se Rama jo vetëm ka blerë deputetët e PDIU-së, por edhe vodhi mandatin e Tiranës.
“Rama i bleu deputetët që ishin në siglën e PDIU, dhe jo vetëm kaq, por na u vodh mandati i Tiranës”, – tha Idrizi.
Sipas tij, “Rama po e çon vendin në vend të paditur, e duhet të dalin nga ky tranzicion 27-vjeçar. Mos të harrojmë se në 27 vjet, Rama ka qenë 20 vite në pushtet”.
Duke iu përgjigjur pyetjes se përse PDIU po kalon në opozitë, ai tha: “Po shkojmë në opozitë për ta bërë atë më të fortë, e sot kjo opozitë është në mazhorancë numerike. Rama nuk ka asnjë prioritet ekonomik, por ka vetëm PPP për interesat e veta. Opozita është në pikën që duhet të japë alternativën”.
Kur gazetari Rezear Xhaxhiu e pyeti: Përse vendosët ta braktisnit rreshtimin tuaj nga Rilindja. Ishte braktisje, apo dikush nuk ju donte?
Idrizi u përgjigj: E para nuk do ta quaja braktisje, sepse nga pikëpamja formale PDIU ishte në opozitë, pasi nga zgjedhjet e kaluara PDIU ishte në opozitë dhe PS në mazhorancë. Në fakt, ka një braktisje të madhe nga kjo shumicë për Çështjen Çame. Në mandatin e parë e kishte pjesë të programit të saj, por në mandatin e dytë, Çështja Çame nuk është më pjesë e këtij programi.
Në momentin që ne prisnim zgjidhje për Çështjen Çame, Rama shprehej se e përdori Çështjen Çame si çakmak për ngritjen e temperaturave me Greqinë. Tani Edi Rama ka braktisur shqiptarët e Çamërisë dhe është bërë palë me grekët.
Sipas Idrizit, PDIU e ka bërë të qartë se do të jetë me këdo që është me Çështjen Çame, ndërsa shtoi që kjo parti nuk do të ekzistojë më, atëherë kur Çështja Çame të jetë zgjidhur.
“Se akuzohemi për tepsi. Ja tani jemi në opozitë. Nuk ka lëvizur PDIU, një herë të vetme kemi lëvizur. Tani jemi në habitatin tonë. PDIU e ka thënë jemi me atë që do të punojë për Çështjen Çame. Duan të na heqin qafe ne? Zgjidhni Çështjen Çame dhe s’ka më PDIU”, – tha ndër të tjera Idrizi.
/b.d
