Ministrja e Shëndetësisë Ogerta Manastirliu, ka vizituar në spitalin e “Traumës” në kryeqytet, katër pjesëtarët e familjes Gjoka, të cilët u plagosën rëndë këtë mëngjes nga shpërthimi i bombolave të gazit në hotelin e tyre në Velipojë.
“Mjekët dhe infermierët në reanimacionin e repartit të Djegie-Plastikës në QSUT, po bëjnë maksimumin për t’u kujdesur për familjen e lënduar në ngjarjen e rëndë në Velipojë.
Stafi ynë po bën më të mirën, duke e trajtuar nënën dhe fëmijët me terapinë e plotë të mjekimit, por situata mbetet tejet kritike” tha Manastirliu.
Mjekët e kanë cilësuar gjendjen e katër pjesëtarëve, si tejet të rëndë, thonë burime për “BalkanWeb”. Kujtojmë se shpërthimi ndodhi mëngjesin e sotëm.
40-vjeçarja A. Gjoka, ishte ngritur në mëngjes për të përgatitur kafe dhe pikërisht në këtë moment ka ndodhur shpërthimi i fuqishëm. Dyshohet se më parë ka pasur një rrjedhje gazi të bombolave më të vogla, çka ka çuar më pas në shpërthimin e fuqishëm, i cili është dëgjuar në një pjesë të mirë të plazhit të Velipojës.
Gjendja e familjarëve të plagosur:
Referuar burimeve, djegiet janë të gradës së tretë e të katërt dhe katër anëtarët e familjes Gjoka janë në gjendje të rëndë dhe në rrezik për jetën.
Mjekët kanë thënë se ata nuk mund të transferohen në Itali, pasi gjendja e tyre është shumë e rëndë. Gjithashtu, referuar faktit që familjarët e djegur ishin futur në pishinë, mjekët kanë pohuar se në momentin që përfshihesh nga flakët, uji ndihmon në frenimin e djegies së trupit, por në rastin konkret pishina ka pasur klor, një kimikat ky që mendohet se ndikon negativisht në djegien e trupit./m.j
