Partia Demokratike ka nisur përgatitjet për procesin e primareve, dhe në një njoftim u bë e ditur se kryetarët e degëve të kësaj force politike, nëse do të duan të garojnë në primare, do të duhet të japin dorëheqjen. Ndërsa, për Drejtuesit e Qarqeve, kryedemokrati Berisha tha se do të të jetë Këshilli Kombëtar ai që do të vendosë.
E pyetur për mendimin e saj rreth kësaj çështjeje, deputetja Dhurata Çupi theksoi se PD ka një statut dhe ky statut duhet zbatuar gërmë për gërmë nëse PD do t’u tregojë qytetarëve që është një alternativë për këto zgjedhje.
“Pro primareve, PD ka një statut…është një parti e konsoliduar. Ne do duhet të zbatojmë statutin e partisë sonë. Të zbatojmë rregullat e familjes sonë politike që më pas të kemi autoritetin moral, për t’iu drejtuar me votë shqiptarëve. Duhet të zbatohet dispozita në statut mbi Primaret, një anëtar një votë. Të gjithë kandidadët për zgjedhjet parlamentare, dispozita e ka të qartë, do të duhet që të kalojnë në primare. Dhe unë jam pro primareve, pro zbatimit të statutit. Nuk ka rrugë tjetër.”
Drejtuesit e qarqeve do t’i nënshtrohen primareve?
Çupi: “Statuti thotë të gjithë kandidatët, për deputetë në zgjedhje parlamentare apo lokale do duhet të futen në Primare. Nuk përjashtohen…”
Do ishit pro që të gjithë drejtuesit e qarqeve të kandidojnë në primare?
Çupi: “Kryetari i PD, është zgjedhur një anëtar, një votë, vetëm ai nuk mund të futet në Primare. Të gjithë të tjerët do duhet të futen në primare për t’u thënë qyetarëve që jemi të drejtë, jemi të barabartë e që më 11 maj nuk kemi probleme me njëri-tjetrin.”
Deputetja demokrate e pranoi se nëse drejtuesit e qarqeve nuk do të garojnë në primare, kjo mund të konsiderohej shkelje e statutit.
“Këto janë zgjedhje të Këshillit Kombëtar, besoj që statuti do të zbatohet pikë për pikë,” shtoi ajo.
