Një përpjekje legjislative e Koresë së Jugut për të fajësuar presidentin Yoon Suk Yeol lidhur me vendosjen jetëshkurtër të ligjit ushtarak ra pasi shumica e anëtarëve të partisë së tij konservatore qeverisëse bojkotuan votimin. Mocioni i fajësimit nuk mori 200 votat e kërkuara për miratimin e tij, që do të çonte në shkarkimin e Yoon Suk Yeol.
Kjo pritet të intensifikojë protestat publike që bëjnë thirrje për rrëzimin e Yoon dhe thellimin e kaosit politik në Korenë e Jugut.
Dhjetra mijra vetë u mblodhën jashtë Asamblesë Kombëtare të Koresë së Jugut në Seul duke bërë thirrje për largimin e Yoon.
Më herët këtë të shtunë, ai kërkoi ndjesë për deklarimin e ligjit ushtarak të martën, një masë që u përmbys shpejt nga ligjbërësit, dhe tha se nuk do ta bënte sërish një veprim të tillë.
“Më vjen shumë keq dhe sinqerisht u kërkoj falje qytetarëve që duhet të jenë tronditur shumë,” tha Yoon, duke pranuar se ai “u shkaktoi ankth dhe shqetësim” qytetarëve koreano-jugorë. Ai tha se “nuk do të shmangë përgjegjësinë ligjore dhe politike lidhur me këtë deklaratë të ligjit ushtarak.”
Yoon shpalli ligjin ushtarak në një fjalim televiziv të paparalajmëruar, duke akuzuar partinë kryesore opozitare për simpatizim me Korenë e Veriut dhe për “veprimtari anti-shtetërore”. Megjithatë, brenda vetëm gjashtë orësh, udhëheqësi u detyrua të tërhiqej, pasi ligjvënësit rrëzuan njëzëri dekretin.
/a.r
