Posta Shqiptare ka sqaruar se nga kontrolli i bërë disa ditë më parë në degën e Postës Dibër, ka konstatuar abuzimin e ndodhur në Maqellarë, ku punonjësi i Postës së kësaj dege ka përvetësuar një pjesë të konsiderueshme nga fondi i pensioneve dhe ndihmës ekonomike.
Drejtoria e Përgjithshme e Postës Shqiptare ka bërë verifikimet përkatëse dhe rezulton se personi përgjegjës (Skerdilajd Hoxha) nuk është paraqitur prej 3 ditësh.
Në këto rrethana, prej ditës së djeshme për këtë punonjës është bërë shkarkimi dhe menjëherë është bërë kallëzim penal nga vetë Posta Shqiptare.
Gjithashtu është shkarkuar nga detyra edhe Drejtoresha e degës Peshkopi, shefja e financës dhe arkëtarja e kësaj dege. Ndërkohë edhe për këta persona është bërë kallëzim penal.
Posta shprehet se nuk ka raste të tjera që punonjësit e postës në këtë qark të kenë shkelur ligjin.
Ndërkohë që këtë rast e kishte denoncuar edhe deputeti i Dibrës, Sherefedin Shehu.
Sipas tij, në Maqellarë punonjësi Skerdilajd Hoxha ka vjedhur 80 milionë lekë të vjetra dhe është larguar drejt SHBA-ve tashmë prej 1 javë.
“Në Sllavë punonjësi tjetër pëllumb Çorja ka vjedhur 20 milionë lekë të vjetra të pensioneve dhe familjeve në nevojë por që ende nuk është denoncuar kjo edhe për faktin se ai është kunati i drejtoreshës së postës, Zana Çorja”, shprehet Sherefedin Shehu./a.m.
