Është hedhur në ambientet e Federatës Shqiptare të Futbollit shorti për kalendarin e Kategorisë Superiore për edicionin 2019-2020.
Shorti ka vënë përballë njëra-tjetrës që në javën e parë kampionët në fuqi të Partizanit me nënkampionët e Kukësit.
Përballje tjetër interesante e javës së parë do të jetë ajo mes Vllaznisë së rikthyer në elitën e futbollit dhe Laçit.
Në ndeshjet e tjera të ngritjes së siparit të Kategorisë Superiore, Teuta do të presë Bylisin, Skënderbeu do të përballet me vlonjatët e Flamurtarit ndërsa Tirana do të ndeshjet me Luftëtarin.
Edicioni i ri futbollistik do të nisë më 24 gusht dhe pritet të përfundojë në mes të muajit maj.
Ashtu si dhe në sezonin e kaluar në këtë sezon në Kategorinë Superiore do të marrin pjesë 10 skuadra që do të përballen mes tyre plot 4 herë.
Disa javë para hedhjes së shortit u raportua se 4 klube të Kategorisë Superiore rrezikonin përjashtimin nga kampionati i sezonit të ardhshëm, pasi nuk kanë plotësonin kriteret financiare, si shlyerja e detyrimeve dhe rregullimi i bilanceve, por mesa duke këto probleme janë mbyllur përkohësisht dhe futbolli do të nisë të luhet në fushat shqiptare në javën e fundit të këtij muaji.
