Asambleja e Përgjithshme e Shoqatës Greke të Biznesit në Shqipëri zgjodhi Bordin e ri Drejtues, si më poshtë:
Georgios Papanastasiou (Alpha Bank Albania), Kryetar. Z. Konstantinos Tsigaras (Tirana Bank), Zëvendëskryetar. Z. Efthymios Navridis (Egna Law Firm), Sekretar i Përgjithshëm. Z. Charalampos Bartzelis (Sideral), Arkëtar. Z. Mario Bracci (Antea Cement), Anëtar dhe Z. George Lantzas (PPC Albania), Anëtar.
Shoqata Greke e Biznesit në Shqipëri, themeluar në vitin 2003, është zëri kryesor i bizneseve greke në Shqipëri, që janë investuesit më të mëdhenj në vend, me një total investimesh prej rreth 1.5 miliard eurosh, duke forcuar në këtë mënyrë marrëdhëniet dypalëshe socio-ekonomike midis dy vendeve. Ajo mbështet dhe inkurajon gjithashtu anëtarët e saj që të zhvillojnë dhe të mbrojnë aktivitetet e tyre të biznesit si një pjesë integrale e komunitetit të biznesit vendor.
Aspirata e shoqatës është që të zhvillojë dhe të forcojë lidhjet e përbashkëta ekonomike, arsimore, tregtare dhe kulturore midis Shqipërisë dhe Greqisë, sikurse dhe zhvillimin e mëtejshëm të shpirtit të ndihmës reciproke midis dy vendeve.
Anëtarët e Shoqatës Greke të Biznesit në Shqipëri përfaqësojnë një spektër të gjerë biznesesh në vendin tonë, që nga sipërmarrjet e vogla dhe të mesme, deri te kompani të mëdha me shtrirje globale, në fusha si: arsimi, telekomunikacioni, sistemi bankar dhe financar, tregtia, kujdesi shëndetësor dhe bukuria, ushqimi, materialet e ndërtimit, investime të reja si dhe shërbime profesionale (si reklamimi, këshillimi, auditimi etj.).
