Ministri i Mirëqënies Sociale dhe Rinisë, Blendi Klosi mori pjesë të martën, në aktivitetin për shpërndarjen e mjeteve shkollore dhe veshjeve, për 950 fëmijë jetimë nga e gjithë Shqipëria, dhuruar nga shoqata e Katarit në Shqipëri.
122 mijë euro për mjetet mësimore dhe veshje për fëmijët dhurohen në prag të nisjes së vitit të ri arsimor. Ministri Klosi vlerësoi këtë nismë, aq më shumë që ajo shkon për më të vegjlit.
“Solidariteti me njëri – tjetrin, me të dobtit, me njerëzit më në nevojë, mbase nuk zgjidh plotësisht nevojat e tyre, por ata ndiejnë që nuk janë vetëm. Nisma të tilla të përmasave të mëdha si kjo e sotmja, por edhe më të vogla, edhe individuale, edhe sado modeste për njerëzit në nevojë, janë një mesazh i fortë solidariteti dhe mbështetjeje”, tha Klosi, duke inkurajuar nisma të tilla.
Ministria e Mirëqenies Sociale dhe Rinisë bashkë me Fondacionin e Katarit, sipas tij, “do të vazhdojë të japë një mbështetje të madhe për këta fëmijë gjatë periudhës së shkollës dhe natyrisht edhe për familjet e tyre”./a.m.
