Bankat shprehen të frikësuara se ngjarje të tilla, si ajo e 9 prillit në aeroportin e Rinasit, nëse mbeten të pazbardhura, do të frymëzojnë raste të tjera në të ardhmen.
Sipas sekretarit të Shoqatës së Bankave, Spiro Brumbulli, ka qenë siguria e aeroportit ajo që ka çeduar në ngjarje.
Kërkesa që bankat i drejtojnë autoriteteve është për përforcimin e protokolleve të sigurisë dhe identifikimin e plotë të përgjegjësve.
Sipas Brumbullit, paratë e bankave të grabitura do të paguhen nga shqiptarët nëpërmjet çmimeve më të larta për shërbimet që do t’iu ofrojnë klientëve, për shkak të shtrenjtimit të primit të sigurimit.
“Janë 4-5 grabitje pa autorë dhe bankat sigurisht që këtë risk të shtuar dhe të humbjeve, fillojnë e reflektojnë në çmime, komisione më të rritura, interes më të lartë.
Ky është një zinxhir, i cili askujt nga ne nuk i leverdis.
Nuk është se e pranojmë dhe ndodhi e në fund të fundit çfarë u bë.
Jo, ka lidhje me imazhin, nga pikëpamja financiare, efektet negative janë shumëplanëshe”, shprehet Spiro Brumbulli, sekretar i shoqatës së bankave të Shqipërisë.
Në raste të tilla, kompanitë e sigurimit rimbursojnë deri në 85% të shumës. Pjesa tjetër përfundon si humbje.
/a.rada
