Rikthehet rreizku i përmbytjeve në vend, këtë herë në Veri të vendit. Gjatë orëve në vijim dhe ditës së nesërme kryesisht priten reshje intensive, kryesisht në Veri të vendit. Kjo ka rritur ndjeshëm rrezikun e përmbytjeve.
“Priten reshje mesatare në shumicën e qarqeve (përjashtuar qarqet Berat dhe Fier, ku do të jenë të dobëta), lokalisht edhe shtrëngata (siç tregohet në tabelë, respektivisht për secilin qark). Reshjet do të bien kryesisht gjatë pjesës së dytë të ditës së nesërme. Pritet prania e reshjeve në formë dëbore në 1100 m mbi nivelin e detit, kryesisht në veri dhe veri-lindje të vendit”, bën me dije Instituti i Gjeoshkencave, Energjisë, Ujit dhe Mjedisit.
Kombinimi i reshjeve me shkrirjen e dëborës shton rrezikun për përmbytje.
Hapen portat e hidrocentraleve, qindra hektarë nën ujë
Reshjet intensive dhe shkrirja e dëborës ka sjellë prurje të mëdha në kaskadën e Drinit, duke e çuar nivelin e ujit pranë pikës së rrezikut.
Në këto kushte, janë hapur portat e HEC-it të Fierzës fillimisht e më pas në ato të Komanit e Vaut të Dejës.
Shkarkimet në Fierzë kanë nisur prej ditës së djeshme me një sasi prej 400 metër kub për sekondë ndërkohë që prurjet kanë qenë intensive, 1300 metër kub për sekondë.
Raportohet se hapja e portave ka sjellë probleme në Urën e Drinit ku prezenca e ujit po rritet me shpejtësi. Qarkullimi në këtë aks për momentin kryhet vetëm nga mjetet e mëdha.
Në komunën Ana e Malit rreth 300 ha tokë janë nën ujë. Nëse shkakrimi nga HEC-et vijon, rrezikohen serioziosht përmbytjet pasi orët në vijim priten reshje intensive shiu.
/a.m.
