Një 44-vjeçar nga Kuçova ka rënë në prangat e policisë së Lushnjës pasi u kap në flagrancë duke blerë kokainë në një servis në fshatin Dushk.
Mbi të rëndon edhe një tjetër akuzë, pasi në automjetin e tij ndodhej edhe një vajzë 24-vjeçare të cilën dyshohet se e shfrytëzonte për prostitucion.
“U arrestua Z. S., 44 vjeç, banues në Kuçovë. Ky shtetas kishte shkuar në ambientet e servisit, për të blerë lëndë narkotike, i shoqëruar nga një shtetase 24 vjeçe nga Kuçova, të cilën dyshohet se ai e shfrytëzonte për prostitucion.”
Po ashtu janë arrestuar dy persona të cilët kishin përshtatur ambientet e servisit të automjeteve, për përdorim dhe shitje të kokainës.
“Si rezultat i kontrolleve të ushtruara për goditjen e veprimtarisë kriminale në fushën e narkotikëve, bazuar dhe në informacionet e siguruara në rrugë operative, në kuadër të operacionit policor të koduar “Koordinimi”, është zbuluar një servis automjetesh i përshtatur për përdorim dhe shitje të lëndëve narkotike. Në ambientet e servisit, u kapën në flagrancë dhe u arrestuan shtetasit: A. S., 40 vjeç, banues në Lushnjë dhe B. T., 62 vjeç, banues në Dushk, Lushnjë, pasi gjatë kontrollit në ambientet e servisit në administrim nga shtetasi A. S., në të cilin ishte i punësuar shtetasi B. T., shërbimet e Policisë gjetën sasi lënde të dyshuar narkotike kokainë, e ndarë në doza, gati për shitje.”
Në cilësinë e provës materiale u sekuestruan dozat e kokainës që u gjetën në ambientet e servisit, 2 peshore elektronike, shuma parash të valutave të ndryshme dhe 3 celularë.
