Ilirjan Selmanaj shkoi në shtëpinë e partneres së tij mbrëmjen e së dielës dhe prej aty doli në mëngjes, pasi i mori jetën asaj. E goditi atë dhjetëra herë me thikë, duke i shkaktuar vdekjen. Për të fshehur krimin makabër, i vuri flakën shtëpisë.
Janë këto disa prej detajeve të rënda që sjell këtë të martë gazetarja Daniela Zisi nga qyteti i Pogradecit, aty ku mëngjesin e 28 korrikut policia zbuloi vrasjen e 52-vjeçares Kozeta Teço dhe vuri në pranga si autor të dyshuar partnerin e saj 31-vjeçar. Ky i fundit, pavarësisht të gjitha provave të forta të hetuesve, vijon të mohojë gjithçka.
“Policia dhe prokuroria e Korçës kanë prova të qarta dhe të forta se 31-vjeçari, mbrëmjen e së dielës, ka hyrë dhe ka kaluar natën në banesën e 52-vjeçares. Gjatë marrjes në pyetje, i dyshuari ka mbajtur qëndrim mohues për akuzën e vrasjes, por ka deklaruar se ka shkuar në mëngjes në banesën e 52-vjeçares për të marrë mbeturinat dhe për t’i hedhur në kosh. Megjithëse është vënë përballë provave të qarta filmike nga autoritetet hetimore, ku ai duket teksa hedh peshqirë dhe batanije të përgjakura, në kazanin e mbeturinave që ndodhet përballë pallatit ku ka ndodhur krimi, ai ka vazhduar të mbajë qëndrim mohues. E njëjta gjë ka ndodhur edhe gjatë eksperimentit hetimor, ku ai ka mohuar krimin”, thotë gazetarja Zisi.
Për shkaqe ende të panjohura, ata dyshohet se u përfshinë në një sherr që i kushtoi jetën Kozeta Teços. Selmanaj, 31 vjeç, kishte një lidhje intime me gruan 52-vjeçare.
“Dyshohet se gjatë mbrëmjes, çifti ka pasur një konflikt që ka agravuar në dhunë fizike nga 31-vjeçari, i cili, pasi i ka prerë fytin partneres së tij, e ka goditur dhjetëra herë me thikë në trup. Raporti mjeko-ligjor konstaton se vdekja e 52-vjeçares ka ardhur pikërisht nga goditjet me thikë, të cilat janë të shpërndara në të gjithë trupin”, raporton gazetarja.
Lidhja mes tyre vijonte prej tre vitesh dhe kundërshtohej nga familjarët e të riut. Megjithatë, familjarët e 31-vjeçarit kanë mohuar që ai të jetë autor i kësaj ngjarjeje të rëndë.
“Ata ishin në dijeni të lidhjes së tyre, siç pohoi edhe jashtë kamerave nëna e Ilir Selmanajt. Ajo ka pohuar se, për shkak të kësaj marrëdhënieje, kishin konflikte të shpeshta me djalin e tyre, duke i kërkuar që kjo lidhje të përfundonte. Megjithatë, nëna e 31-vjeçarit ka kërkuar zbardhjen e vrasjes së gruas, duke mohuar që autor të jetë i biri”, shton gazetarja.
Kjo e fundit, duke iu referuar burimeve nga policia, sqaron po ashtu se 31-vjeçari njihej si përdorues i lëndëve narkotike, për shkak të të cilave ai shfaqte edhe shenja depresioni.
