Drejtori i Gatishmërisë dhe Emergjencave, Robert Hysenllari tha se deri më tani 24 familje janë evakuuar për shkak të përmbytjeve si pasojë e reshjeve të shiut që kanë përfshirë vendin që prej ditës së djeshme.
I ftuar në Euronews Albania, ai deklaroi se qyteti më i prekur është Shkodra duke thënë se 150 banesa kanë pasur probleme me ujin. Ai shtoi se deri më tani në të gjithë vendin 3500 hektarë tokë ndodhen nën ujë.
“150 banesa kanë probleme me ujin, ndërkohë 24 familje janë evakuuar. Përgjithësisht banesat kanë qenë në qarkun e Shkodrës. Disa banorë kanë zgjedhur që të qëndrojnë te të afërmit, ndërsa për të tjerët ka konvikte, hotele. Ka variante të ndryshme për sistemimin e banorëve.
Ndërkohë në qarkun e Durrësit ka pasur rrëshqitje të dheut, ku ka pasur ndërhyrje. Në qarkun e Tiranës ka pasur probleme, por me ndërhyrje situata është zgjidhur.
Sakaq deri më tani 3500 hektarë tokë janë përmbytur”- nënvizoi Hysenllari.
Hysenllari deklaroi se ishte e ditur fakti që vendi do të përfshihej nga moti i keq dhe se do të kishte dëme nga reshjet, pasi u informuan nga Instituti i Gjeoshkencave. Hysenllari u shpreh se megjithëse kishin marrë iformacione, nuk pritej që dëmet nga reshjet të ishin kaq të shumta.
“Kjo situatë ka qenë e njohur, e ditur nga Agjencia Kombëtare e Mbrojtjes Civile, për arsye se ne marrim të dhëna nga Instituti i Gjeoshkencave. Situatën e kishim të pritshme, që do kishim këto reshje shiu, në të dhëna të përafërta dhe jo në të dhënat ekzakte, pasi anjëherë nuk mund të përcaktojmë sesa reshje shiu do të bien.
Agjencia Kombëtare e Mbrojtjes Civile mori masat dhe njoftoi strukturat për të rritur gatishmërinë e tyre dhe për të marrë masa në pastrimin e pikave kyçce, që mund të kishin bllokim të kanaleve, ose në pjesët ku janë urat. Kjo është e paparashikueshme. Ka fatkeqësi që mund të paralajmërojnë, por edhe fatkeqësi që nuk mund të paralajmërojnë”, theksoi ai.
/s.f
