Pas masakrës së Dajçit, Shkodra tronditet sërish nga krimi. Një 42-vjeçar është ekzekutuar me armë zjarri mesditën e sotme te ura në fshatin Mali Jushit, në aksin rrugor Shkodër-Velipojë.
Burime për “BalkanWeb” bëjnë të ditur se në zonë janë dëgjuar të shtëna me armë dhe dëshmitarët kanë parë një person të vdekur, por kur mbërriti policia nuk e gjeti turpin e viktimës në vendin e ngjarjes.
Ndërkohë, sipas informacionit zyrtar të policisë, viktimë ka mbetur 42-vjeçari Gent Mhillaj, banues në Torovicë, por nuk jep të dhëna për vendndoshjen e trupit të viktimës.
Momentalisht mbeten ende të panjohura shkaqet dhe autorët e krimit, ndërsa policia ka ngritur pika kontrolli në bashkëpunim me shërbimet policore në Lezhë me qëllim identifikimin dhe kapjen e autorëve.
NJOFTIMI I POLICISE:
Me datë 06.10.2016 rreth orës 11:00 është marrë njoftim se te ura në fshatin Mali Jushit ka të shtëna me armë zjarri.
Menjëherë në vendngjarje kanë mbërritur shërbimet policore të cilët kanë konstatuar se ka mbetur i vrarë shtetasi Gent Mhillaj, 42 vjeç, banues në Torovicë.
Janë ngritur pika kontrolli si dhe po bëhet krehja e zonës në bashkëpunim me shërbimet policore në Lezhë me qëllim identifikimin dhe kapjen e autorit dhe vendosjen para përgjegjësisë penale.
Grupi hetimor në vendngjarje vazhdon veprimet hetimore për zbardhjen e plotë të ngjarjes.
BW/d.i.
