Shkodër, tifozët e Vllaznisë në protestë: Të ikin drejtuesit
Pas dorëheqjes së trajnerit Luan Zmijani një ditë më parë, tifozët e Vllaznisë kanë protestuar para Bashkisë së qytetit, duke kërkuar largimin e drejtuesve të klubit, respektivisht të drejtorit sportiv Admir Grima dhe të administratorit të klubit Neritan Kalamishi.
Protesta e tyre ka qenë e qetë dhe tifozët mbanin në duar parulla që akuzonin krerët e klubit për ecurinë e dobët të skuadrës në kampionat dhe menaxhimin e keq të fondeve.
Pas 5 javësh kampionat, Vllaznia ka 0 pikë në renditje, në po kaq ndeshje të luajtura. Për momentin, vendi i trajnerit është vakant pas dorëheqjes së Zmijanit dhe në Shkodër qarkullojnë zëra se ekipin mund ta drejtojë ish-futbollisti Edi Martini.
