15 mijë e 500 metër katror ullishte janë sekuestruar nga Prokuroria e Shkodrës pasi ka dyshime se kjo pasuri është kryer sipas një procedurë false.
Vlera e truallit në fjalë që ndodhet në fshatin Berdicë e Sipërme mendohet se kap vlerën e 120 mijë eurove dhe veprimet janë kryer në favor të një shtetasi shqiptar që jeton në Kanada.
Ka qenë vetë organi i akuzës që në përmbyllje të hetimeve, ka bërë me dije se zyra e regjistrimit të pasurive të paluajtshme Shkodër ka regjistruar një pronë me numër pasurie 2/27 zona kadastrale 1159 në Berdicë të Sipërme, raporton “Ora News”.
Ky truall rezulton të jetë ullishte, në emër të shtetasit Adem Mlloja dhe bashkëpronarëve të tjerë thotë në njoftimin e saj prokuroria e Shkodrës. Mbi bazën e akteve të cilat dyshohen se janë falsifikuar me vendim të këshillit të komunës nr 19 të datës 14 korrik 2014 dhe akti i marrjes së tokës bujqësore në pronësi nr 46 të po të njëjtës datë.
Mbi këto dyshime të ngritura nga prokuroria, janë nën hetim edhe disa punonjës të zyrës së regjistrimit të pasurive të paluajtshme dhe vetë përfituesit, pasi janë kryer veprime në kundërshtim me ligjin./a.m.
