Rektorati i Universitetit të Shkodrës pezullon nga detyra dy pedagogët e arrestuar një ditë më parë së bashkuë me disa studentë dhe sekserë të akuzuar për korrupsion sepse merrnin shuma të mëdha parash në këmbim të një note.
Në një njoftim të Universitetit të Shkodrës thuhet se rektorati u mblodh urgjentisht dhe vendosi: pezullimi nga detyra e zv.dekanit të Fakultetit të Shkencave Shoqërore dhe pedagogut të departamentit të Historisë në Universitetin e Shkodrës të Z. Rokin Daberdaku.
Pezullimi nga detyra e përgjegjësit të departamentit dhe pedagogut të departamentit të Historisë, në Fakultetin e Shkencave Shoqërore të Z.Simon Lufi.
Rektorati i Universitetit të Shkodrës thotë se respekton punën e organeve kompetente dhe është për transparencë maksimale
“Shprehim dhe mbështesim fuqimisht një transparencë maksimale në këtë proces. Stafi akademik, autoritetet dhe organet drejtuese të Universitetit mbeten të angazhuar për përmbushjen me profesionalizëm të misionit akademik.”
Nga hetimi i organit të akuzës, mësohet se nëpërmjet disa personave që kryenin rolin e sekserëve, ata kanë krijuar një skemë korrupsioni në dhënien e provimeve, në vlera monetare që varionin nga 200- 700 euro./panorama/a.k
