Një vrasje me armë zjarri është shënuar mesnatën e kaluar në qytetin e Shkodrës. I vrarë ka mbetur 42-vjeçari Ilir Alija me profesion mjek, i cili është qëlluar nga Dritan Ymeri.
Viktima dhe autori ishin fqinjë, ndërsa shkak për ngjarjen dyshohet të ketë qenë një konflikt për pronën.
Ngjarja ka ndodhur rreth orës 23:40 të së premtes, në lagjen “Qemal Stafa”, ndërsa policia bën me dije se Ymeri ka qëlluar disa herë me armë zjarri mbi Alijan dhe për pasojë duke i shkaktuar këtij të fundit vdekjen e menjëhershme.
Edhe pse u kërkua ndërhyrja e forcave RENEA për arrestimin e autorit, ai ka mundur të ikë nga banesa ku mbahej i rrethuar nga forcat e rendit.
Viktima ishte me profesion mjek
Mësohet se Ilir Alija, 42-vjeç ishte me profesion mjek.
Ai është qëlluar për vdekje me armë zjarri nga 26-vjeçari Dritan Ymeri, pas një konflikti të gjatë mes dy familjeve për shkaqe pronësie.
Konflikti për pronën
Dyshohet se konflikti ka ndodhur për shkaqe pronësie dhe se në çastin e vrasjes, prezent ka qënë dhe djali 16-vjeçar i viktimës.
Sipas gazetarit të Shqiptarja.com, Elvis Nabolli i cili ndodhet në vendngjarje, raportohet se mjeku Aliaj ka pasur konflikte të hershme pronësie me familjen Ymeri dhe konfliktet janë shtuar pasi viktima ka nisur të ndërtojë katin e katërt të banesës, ndërkohë që në të njëjtin kat jetonte dhe autori Ymeri.
Duke mos rënë në dakordësi për ndërtimin e shtesës, natën e së premtes shtetasi Dritan Ymeraj ka marrë armën dhe ka shtënë në drejtim të Ilir Aliajt duke e lënë të vrarë.
Zhvillimet nga ngjarja në Shkodër
Ora 05:00 Dështon operacioni i policisë për arrestimin e autorit
04:35 Ndërhyjnë forcat RENEA/ Autori nuk gjendet
Pas thirrjeve për dorëzim, rreth 5 orë pas ngjarjes së rëndë, forcat RENEA, kanë ndërhyrë në banesën ku dyshohej se gjendej Dritan Ymeri, por autori nuk gjendej aty.
Orët e Pritjes për dorëzim, i kanë dhënë mundësi autorit të largohet shumë larg vetngjarjes.
04:20 RENEA i bën thirrje Dritan Ymerit për t’u dorëzuar
03:30 RENEA mbërrin në Shkodër
02:20 Autori nuk pranon të dorëzohet/ Pritet ndërhyrja nga forcat RENEA
Pas negociatave të Policisë, FNSH-së dhe xhaxhait të tij, Ymeraj nuk ka pranuar të dorëzohet dhe sipas burimeve të Shqiptarja.com bëhet me dije se pritet ardhja e RENEA nga Tirana, për të ndërhyrë dhe neutralizuar autorin e krimit i cili ndodhet i ngujuar në banesën e tij.
01:30 Po zhvillohen negociatat për dorëzimin e Ymerajt, në negociata është përfshirë dhe xhaxhai i tij.
Policia e Shkodrës dhe FNSH-ja ndodhet në vendngjarje dhe kanë rrethuar autorin i cili dyshohet se gjendet i armatosur në afërsi të banesës ku ka ndodhur vrasja.
00:40 Njoftim paraprak nga Drejtoria e Policisë Shkodër
Shkodër- Informacion Paraprak
Në sallën operative të Drejtorisë Vendore të Policisë Shkodër ka ardhur një telefonatë për nje vrasje të ndodhur në lagjen “Qemal Stafa”, te “Ish Dekori”.
Me marrjen e njoftimit, shërbimet e Policisë kanë shkuar menjëherë në vendngjarje ku ka rezultuar se:
Pas një konflikti të çastit mes shtetasit I.A dhe D.Y, ky i fundit ka qëlluar me armë zjarri shtetasin I.A, ku si pasojë e të shtënave ka mbetur i vrarë shtetasi I. A., 40 vjeç, banues në lagjen Qemal Stafa.
Autori i dyshuar shtetasi D.Y, sipas informacioneve dyshohet se është fshehur në banesë, e cila është rrethuar nga Policia dhe pritet ndërhyrja e F.N.SH.
Grupi hetimor në vendngjarje po punon për grumbullimin e provave ligjore duke bërë të mundur sqarimin e rrethanave të ngjarjes si dhe dokumentimin ligjor të saj.
