Policia e Shkodrës ka arrestuar një person të shpallur në kërkim dhe të dënuar me 21 vite burg për vrasje për gjakmarrje, e kryer në bashkëpunim, e mbetur në tentativë dhe Prodhim dhe mbajtje pa leje e armëve luftarake dhe municionit. “Gjatë operacionit të koduar “Kasneci” u arrestua Lazër Qukaj 27 vjeç. Ky shtetas, ka qënë i shpallur në kërkim nga Drejtoria Vendore e Policisë Shkodër pasi Prokuroria e Krimeve të Rënda Tiranë më datë 20.04.2016 ka nxjerre urdhërin për ekzekutimin e vendimit më datë 19.04.2016 të Gjykatës Apelit për Krimet e Rënda, e cila e ka deklaruar fajtor dhe dënuar me 21 vjet burg për veprat penale: “Vrasje për gjakmarrje, e kryer në bashkëpunim, e mbetur në tentative” dhe “Prodhim dhe mbajtje pa leje e armëve luftarake dhe municionit “Nenet 78/a-25-22, 278/5, të Kodit Penal”, sqaron policia.
Kapja e këtij shtetasi u bë si rezultat i operacionit të kryer nga Sektori për Krimet e Rënda Shkodër në bashkëpunim me forcat e Repartit FNSH Shkodër në orët e para të mëngjesit të datës 24.04.2016, mbi bazën e informacioneve të marra në rrugë operative nga Specialistët për Krimet e Rënda Shkodër.
Materialet i kaluan Prokurorisë pranë Gjykatës së Shkallës së Parë për Krimet e Rënda Tiranë.
