Tashmë historia e biznesmenit gjeorgjiano-izraelit Amiran Dzanashvili, po pasurohet nga ora në orë. Pasi Dzanashvili dha intervistën në Top Channel, djali i ish-kryeministrit Berisha pranoi përmes një postimi në Facebook, se e ka takuar biznesmenin në fjalë. Ndërkohë i jati e kishte akuzuar rëndë Dzanashvilin në parlament një ditë më parë, Shkëlzeni shprehet se e ka takuar atë në prani të disa investitorëve të tjerë, por ja refuzuar konsulencën ligjore. Ja postimi i Sh.Berishës:
“Në fund të vitit 2012, në prani të disa investitorëve të tjerë, Amiran Dzanashvili në takimin e parë dhe të fundit më ka kërkuar t’i ofroj konsulencë ligjore, të cilën ia kam refuzuar, për shkak të informacionit të pamjaftueshëm që kisha për të si person dhe aktivitetin e tij. Mesa duket, konsulencën e refuzuar dhe “patronazhin” për transaksionet e dyshimta, i hetuari për pastrim parash, e ka gjetur tek Ajola Xoxa (bashkëshortja e Erion Velisë), të cilën siç del dhe nga prokura, e ka përdorur si përfaqësuese ligjore për aferat e veta në Shqipëri”, shkruan Shkëlzen Berisha.
