Ndonëse e nisi me këmbën e gabuar ndeshjen ndaj Chievos, portieri shqiptar që mbron portën e Lazios, Etrit Berisha ka ditur jo vetëm që të përmirësohet gjatë 90 minutave, por madje ta mbyllë sfidën në mënyrë të lavdishme, për të marrë mbi vete një pjesë të madhe të meritave për fitoren e thellë të skuadrës laziale, në shifrat 4-1. Në shpërblim që është kurorëzuar maksimalisht sot, me përzgjedhjen e Berishës, si portieri më i mirë i Seria A, për javën që lamë pas raporton Telesport. Gardiani i Kombëtares Kuqezi dhe i Lazios në kampioantin Italian, ka siguruar sot vendin e titullarit në formacionin më të mirë të javës në Seria A.
Kualiteti dhe performanca e Berishës gjatë këtyre javëve, në të cilat është aktivizuar si titullar në mungesë të Marchettit, nuk ka kaluar pa u vënë rë, sidomos pas penalltisë së pritur ndaj Chievos në minutën e 84’. Në shifrat 3-1 në favor të lazialëve, gjyqtari akordoi një 11-metërsh në favor të Chievos, çka do të mund të kishte hapur edhe një herë ndeshjen, për të vënë në rrezik fitoren e Lazios. Por gjuajtja e Paloschit u neutralizua nga portieri Etrit Berisha.
