Një bandë grabitësish, e përbërë nga shtetas shqiptarë, është shkatërruar nga policia greke. Sipas raportimeve të mediave në Greqi, të arrestuarit kryenin grabitje të vilave luksoze në Athinë. Policia thotë se, në cilësinë e provës materiale, janë sekuestruar edhe sende me vlerë, të cilat e kalojnë shumën e 1 milion eurove.
Policia njoftoi pasditen e së martës se ka arrestuar në Agio Dimitrios të Athinës, një 23 vjeçar, pjesëtar i bandës.
Po ashtu, janë identifikuar edhe tre bashkatdhetarë të tij, njeri prej të cilëve, është arratisur nga burgjet e Greqisë.
Ata akuzohen për tre vrasje të mbetur në tentativë, 9 grabitje me armë zjarri dhe 36 vjedhje. Hetimet kanë nxjerrë në dritë se kjo bandë ishte krijuar në muajin prill të vitit 2016, dhe 28 vjeçari i arratisur nga burgu ishte prezent në çdo aktivitet kriminal. Ata vepronin në orët e vona për t’u fshehur më thjeshtë.
Policia ka sekuestruar një sasi të madhe bizhuterish, një armë luftarake dhe tre pistoleta. Një shumë parash prej 11.340 euro, si dhe 1.100 dollarë, mjaft telefona celularë, si dhe një sasi e konsiderueshme targash fallco. Policia ka gjetur 18 automjete dhe ua ka dorëzuar pronarëve të tyre të ligjshëm. Policia flet edhe për tre pjesëtarë të tjerë të kësaj bande, për të cilët ka nxjerrë urdhër arresti ndërkombëtar. /noa.al
c.a
