Disa ditë më parë Policia e Shtetit në bashkëpunim me Prokurorinë finalizuan një super-operacion në kuadër të të cilit u shkatërruan shtatë grupe që kryenin trafik klandestinësh nga Shqipëria me destinacion SHBA-në, Kanadanë, Britaninë etj, kundrejt shumave që shkonin deri në 30 mijë dollarë.
Lidhur me operacionin “One By Lend” sot ka pasur një reagim edhe nga Ambasada Amerikane në Tiranë.
Përfaqësia diplomatike vlerëson punën e kryer nga policia dhe prokuroria.
Reagimi i plotë:
Ambasada e Shteteve të Bashkuara përgëzon Policinë Shqiptare të Shtetit dhe Prokurorinë e Krimeve të Rënda, për përfundimin me sukses të pjesës së dytë të operacionit “One by Land” javën e kaluar, ndërmarrë në bashkëpunim me agjentët specialë të Shërbimit të Sigurimit Diplomatik të Departamentit të Shtetit pranë Ambasadës Amerikane në Tiranë. Ky operacion bëri të mundur shkatërrimin e shtatë grupeve të strukturuara kriminale, të cilët mundësonin kalimin e paligjshëm të kufinjve duke lëshuar dokumenta të flassifikuar. Këto grupe operonin në Shqipëri, Bullgari, Spanjë, Francë, Republikën Domenikane, Itali, Mbretërinë e Bashkuar, Shtetet e Bashkuara dhe Kanada. Si pjesë e operacionit, policia arrestoi dy oficerë shqiptarë policie me detyrë kontrollorë kufiri, të cilët bashkëpunonin me grupet. Shtetet e Bashkuara do të vazhdojnë të ndihmojnë dhe mbështesin përpjekjet në zbatimin e ligjit për të parandaluar emigrimin e paligjshëm dhe për të arrestuar personat përgjegjës./a.m.
