Bën xhiron e rrjeteve pamjet turpëruese të një mjeti të rëndë tip betoniere që shkarkonte ngarkesën e saj në plazhin e Durrësit.
Pas atyre pamjeve ka ardhur edhe reagimi i policisë, që ka deklaruar se ka proceduar penalisht shoferin, shtetasin Gj. N., 43 vjeç, i cili akuzohet tashmë për veprën penale “Ndotja e ujërave”.
Reagimi i Drejtorisë Vendore të Policisë Durrës
Në lidhje me një video të publikuar ditën e sotme në rrjetet sociale ku shfaqej një automjet i tonazhit të rëndë (betoniere), duke derdhur mbetje betoni në buzë të detit në lagjen nr. 13, Durrës, ju sqarojmë se:
Shërbimet e Stacionit të Policisë Plazh, pas transmetimit të pamjeve filmike në rrjetet sociale menjëherë kanë organizuar punën për identifikimin dhe shoqërimin e drejtuesit të betonieres.
Shërbimet e Policisë kanë identifikuar, kapur dhe shoqëruar në ambientet e Policisë, shtetasin Gj. N., 43 vjeç, banues në Katund të Ri, Durrës, ku në përfundim të veprimeve të para hetimore, specialistët për Hetimin e Krimit në Stacionin e Policisë Plazh, proceduan penalisht drejtuesin e betonieres, shtetasin Gj. N., për veprën penale “Ndotja e ujërave”.
Policia e Shtetit falënderon mediat e qytetarët që denoncojnë raste të paligjshmërisë dhe siguron qytetarët se strukturat vendore e qendrore të Policisë do të reagojnë në mënyrë të menjëhershme për të vënë përpara drejtësisë personat e përfshirë në paligjshmëri e krim.
/a.r
