Policia dhe Inspektoriati i Mbrojtjes së Territorit vijon me gjobitjen e subjekteve që ndotin mjedisin apo lumenjtë.
Ditën e sotme janë vendosur gjobë për 10 subjekte, të cilat kanë ndotur lumin Erzen, duke konstatuar shkarkimin e ujërave të ndotura në lumë.
Ndaj këtyre subjekteve IKMT ka marrë masë administrative me gjobë 2 milion lekë për secilin.
“Vijon operacioni kundër krimeve mjedisore përgjatë shtratit të lumit Erzen Gjoba administrative për 10 subjekte që ndotin lumin. Inspektorati Kombëtar i Mjedisit dhe Territorit, në bashkëpunim me Policinë e Shtetit, duke u bazuar në planin e masave për azhornimin e situatës mjedisore të lumit Erzen, në territorin e Qarkut Tiranë ka konstatuar 10 subjekte, të cilat shkarkonin ujëra të ndotura në lumë. Ndaj këtyre subjekteve IKMT ka marrë masë administrative me gjobë 2 milion lekë për secilin. IKMT dhe Policia e Shtetit vijon evidentimet për parandalimin e masakrës mjedisore në lumin Erzen dhe kudo tjetër dhe ndëshkimin e çdo kundërvajtësi që shkakton ndotje, duke ftuar çdo qytetar të denoncojë shkeljet në numrin 112 ose përmes Komisariatit Dixhital.” – njofton IKMT.
/e.rr
