Komisioni parlamentar i Ekonomisë shqyrtoi të enjten kërkesën e anëtarëve të Bordit të Autoritetit të Mbikëqyrjes Financiare, për lirimin nga detyra e kreut të Autoritetit, Enkeleda Shehi.
Pas seancës dëgjimore me anëtarë të bordit Komisioni vendosi të shtyjë për të hënën vendimmarrjen. “Vendimi do të shoqërohet bashkë me kërkesë-arsyet dhe me raportin e komisionin, i cili do të bëhet publik ditën e hëne. Do të ketë pastaj të gjithë bazën materiale për t’iu paraqitur seancës plenare ditën e enjte të javës tjetër”, tha kreu i Komisionit të Ekonomisë, Erion Braçe.
Drejtoresha ekzekutive e AMF-s, Enkeleda Shehi, në fjalën e saj para deputetëve të komisionit tha se vendimi i bordit është i paligjshëm. “Në vendimin e Bordit nuk ka as një shkelje financiare, as abuzive, as shkelje ligjore nga ana ime”, u shpreh ajo.
Kërkesa zyrtare e Bordit të Autoritetit të Mbikëqyrjes Financiare ku kërkohet lirimi nga detyra e kreut të Autoritetit, Enkeleda Shehi u dorëzua në Kuvend në datën 22 shkurt. Bashkangjitur kërkesës Bordi paraqitit arsyet mbi të cilat argumentohet kjo kërkesë që i drejtohet kreut të komisionit të Ekonomisë, Erion Braçe.
“Bordi i Autoritetit të Mbikëqyrjes Financiare në mbledhjen e darës 21 shkurt 2017 shqyrtoi përputhshmërinë ligjore të veprimtarisë së Drejtorit të Përgjithshëm Ekzekutiv dhe vendosi t’i propozojë Kuvendit të Shqipërisë lirimin e Enkeleda Shehit nga detyra e anëtarit të Bordit, në funksionin e Drejtorit të Përgjithshëm Ekzekutiv të AMF”, shkruhet në kërkesën e Bordit të AMF-së./b.d
