Presidenti i vendit Ilir Meta ka dal në mbështetje të nismës së Konfindustrisë për për pezullimin e përkohshëm të procesit të fiskalizimit të detyrueshëm për bizneset.
Kreu i Shtetit deklaron se një pezullim i tillë duhet të ndodhë deri në momentin e dhënies së sigurive të plota teknike dhe ligjore nga shteti për mbrojtjen e të dhënave tregtare të bizneseve, duke iu referuar skandalit të publikimit të pagave të më shumë se 630 mijë shtetasve shqiptarë.
Sipas presidentit, publikimi i pagave dëshmon problematikat e shumta të sigurisë së rrjeteve të informacionit dhe thekson se nëse një gjë e ngjashme ndodh dhe me të dhënat e bizneseve nga fiskalizimit atëherë pasojat do të jenë më të rënda.
Postimi i plotë:
Pasi jam njohur zyrtarisht, si dhe duke vlerësuar interesin e madh publik, kushtetues, sigurisë kombëtare dhe përgjegjësive euroatlantike të vendit, mbështet nismën e Konfindustrisë për pezullimin e përkohshëm të procesit të fiskalizimit të detyrueshëm për bizneset, deri në dhënien e sigurive të plota teknike dhe ligjore nga shteti shqiptar për mbrojtjen e të dhënave tregtare të bizneseve.
Skandali i rrjedhjes së të dhënave personale të qindra mijë qytetarëve shqiptarë në dhjetor 2021 drejtpërdrejt nga agjensia shtetërore përgjegjëse AKSHI, tregon problematikat e shumta të sotme të sigurisë së rrjeteve të informacionit.
U tërheq vëmendjen institucioneve shtetërore, që në rastin e ngjashëm të mundshëm të rrjedhjes së të dhënave masive të siguruara në kohe reale nga procesi i fiskalizimit me detyrim edhe nga dhjetra kompani private ndërmjetëse, pasojat do të jenë shumë më të rënda sesa të skandalit të dhjetorit 2021.
Në ketë rast pasojat do të jenë të rënda për mbi 120 mijë biznese, që rrezikohen nga penalizime gjyqësore në vlera të jashtëzakonshme për shtetin shqiptar, goditje në afatgjatë për ekonominë dhe deri në cenim të sigurisë kombëtare dhe rendit kushtetues.
Mbështes gjithashtu kërkesën për ngritjen e komisionit hetimor parlamentar për nxjerrjen e plotë dhe marrjen e përgjegjësive penale dhe financiare të institucioneve shtetërore dhe kompanive private, shkaktarë të skandalit të rrjedhjes në publik të të dhënave personale të qytetarëve dhe bizneseve në dhjetor 2021./m.j
