Shitja e 100% të aksioneve të kompanisë që ka të drejtat ekskluzive për kërkimin dhe prodhimin e naftës në zonat më të mëdha në Shqipëri, “Bankers Petrolium” dhe firmës kineze “Geo Jade Petrolium” po hetohet nga Autoriteti i Konkurrencës. Ky institucion ka njoftuar përqendrim paraprak të tregut deri në përfundim të hetimit.
Momentalisht shkruan gazeta Mapo ka filluar kontrolli për mënyrën e përfitimit të të drejtave të kësaj kompanie, si dhe për të parë nëse ka ose jo kufizim të tregut. Autoriteti i ka kërkuar shoqërisë kineze dokumentet që provojnë se përfitimi nga firma që sapo ka blerë nuk bëhet për interesa të një pronari të vetëm.
Në kërkimet e autoritetit të konkurrencës ka rezultuar se pronare e “Geo Jade Petroleum Corporation” është “Charter Power Investment Limited”, një shoqëri publike kineze e organizuar sipas legjislacionit të këtij shteti.
Pas 30 ditësh, konkurrenca do të shpallë vendimin nëse ka apo jo kufizim të tregut. Në datën 14 prill, “Bankers” shiti aksionet për 575 milionë dollarë dhe në datën 31 maj do të mbahet një takim special mes aksionarëve të të dyja palëve për të miratuar planin e propozuar të marrëveshjes.
Kompania “Charter Power”, degë e kompanisë kineze “Geo-Jade Petroleum”, ra dakord me “Bankers Petroleum” për të blerë të gjitha aksionet e saj me vlerë 2.2 dollarë për aksion dhe me një shumë totale prej 575 milionë dollarësh pa përfshirë detyrimet.
David French, President dhe Shef Ekzekutiv i Bankers, tha pas shitjes se: “Transaksioni i propozuar i jep Bankers mundësinë për t’iu rikthyer investimin aksionarëve tanë, me një prim të konsiderueshëm, kundrejt vlerësimit aktual të tregut, ndërkohë që i ofron kompanisë burime shtesë financiare për të përshpejtuar aktivitetin tonë në Shqipëri dhe për të kapitalizuar potencialin e krijuar nga mjedisi aktual i çmimeve.
Ky transaksion do të gjenerojë një përfitim të rëndësishëm ekonomik për Shqipërinë dhe për komunitetet lokale ku operon Bankers. Ne presim me padurim për të punuar me investitorët e rinj, për të përfituar prej mundësive të ofruara nga asetet”.
“Bankers” ka qenë deri në vitin 2014 korporata më e madhe në Shqipëri sa u përket të ardhurave, por të ardhurat e saj u përgjysmuan në vitin 2015, si pasojë e rënies së çmimit të naftës në tregun ndërkombëtar.
Çmimi i aksioneve të “Bankers” në bursë, u godit gjatë vitit të fundit, fillimisht si pasojë e rënies së çmimit të naftës në tregun ndërkombëtar dhe më pas, si pasojë e goditjeve që mori nga qeveria shqiptare shtatorin e kaluar, kur Drejtoria e Përgjithshme e Tatimeve kërkoi 75 milionë dollarë taksa, pas një rivlerësimi tatimor mbi shpenzimet e kompanisë në vitin 2011.
