Shtabet e Emergjencave janë ngritur në të gjithë vendin për shkak se duke filluar nga mesdita e sotme pritet një përkeqësim i motit, me reshje të shumta që mund të shkaktojnë përmbytje dhe rrëshqitje të tokës.
Buletinet e instituteve të specializuara meteorologjikë njoftojnë se përkeqësimi i motit mund të shoqërohet fillimisht me reshje me intensitet mesatar, që do të vijnë duke u shtuar.
Ora 08:56- Këputen telat përcjellës në Qafë Mali, Kukësi pa energji
Mësohet se linja e OST-së në Kukës ka defekt si pasojë e këputjes së telave përcjellës nga moti i keq.
Defekti ka ndodhur në linjën e tensionit të lartë në Qafe Mali. Mësohet se grupi i riparim-avarive ndodhet në terren dhe po punon për riparimin e defektit.
Ora 08:45 – Bllokohet qarkullimi në aksin Gjirokastër-Kakavijë
Reshjet e shiut kanë shkaktuar vështirësi të shumta në rrugët e Gjirokastrës, kryesisht sa i përket qarkullimit të automjeteve.
Mësohet se në aksin nacional Gjirokastër-Kakavijë, në vendin e quajtur postbllok, është bllokuar qarkullimi, pasi rruga është mbushur me ujë.
Që prej orëve të para të mëngjesit janë përmbytur edhe rrugët e gurta në pjesën muzeale në Gjirokastër.
Ora 08:05 – Nisin reshjet në Kukës, përmbyten rrugët
Në orët e para të mëngjesit, reshjet kanë nisur në verilindje të vendit duke shkaktuar disa probleme në Kukës, ku rrugët e qytetit janë mbushur me ujë.
Një defekt në linjën e tensionit te lartë në Qafë Mali ka lënë pa energji të gjithë qytetin që prej mbrëmjes së djeshme.
kukes permbytje
Ora 07:00 – Sot përkeqësohet moti, MB jep alarmin: Rrezik përmbytje
Ministria e Punëve të Brendshme ka urdhëruar ngritjen e Shtabeve të Emergjencave në të gjithë vendin për shkak se duke filluar nga mesdita e sotme pritet një përkeqësim i motit, me reshje të shumta që mund të shkaktojnë përmbytje.
Buletinet e instituteve të specializuara meteorologjikë njoftojnë se përkeqësimi i motit mund të shoqërohet fillimisht me reshje me intensitet mesatar, që do të vijnë duke u shtuar.
Përveç përmbytjeve, reshjet mund të shkaktojnë edhe rrëshqitje të tokës në zona të caktuara. Situata pritet të përkeqësohet në datën 8 nëntor, sidomos në njësitë administrative të qarqeve Shkodër, Kukës, Dibër, Lezhë, Tiranë, Durrës, Elbasan, Fier, Vlorë dhe Gjirokastër.
Sipas parashikimeve të Instituteve Meteorologjike, pritet të ketë fryrje të lumenjve që rrezikojnë të dalin nga shtretërit e tyre. Ministria e Punëve të Brendshme ka urdhëruar Prefektët dhe përfaqësuesit e bashkive në të gjithë vendin që, përveç ngritjes së Shtabeve të Emergjencës, të vënë në gadishmëri të gjitha kapacitetet njerëzore e teknike-operacionale për të reaguar sipas situatës.
Ministria e Punëve të Brendshme këshillon shtetasit në zonat që mund të preken nga përmbytjet, të minimizojnë lëvizjet e panevojshme dhe sidomos të fëmijëve të vegjël, të pa shoqëruar nga të rriturit.
MPB kërkon nga shtetasit që t`u binden lajmërimeve të strukturave të pushtetit vendor dhe të japin ndihmesën e tyre ndaj këtyre strukturave.
shqiptarja.com/d.i.
